In my vorige boodskap het ons bietjie gesels oor wát SAWA ís, In hierdie uitgawe wil ek bietjie gesels oor hóé SAWA lýk.
SAWA is ʼn landswye buitelewe organisasie. SAWA strek regoor Suid-Afrika en is verdeel in veertig streke. Die sowat 1900 SAWA-gesinne is elkeen by een van hierdie streke ingedeel.
Elke streek verkies jaarliks, volgens bepaalde voorskrifte, ʼn streeksbestuur wat dan vir die volgende jaar verantwoordelik is vir
daardie streek se aktiwiteite, soos saamtrekke en toere.
Saamtrekke, ongeveer eenkeer per maand, word gewoonlik oor naweke gereël. Hierdie geleenthede word noukeurig deur die streeksbestuur beplan en georganiseer om die maksimum aantal lede van die streek die geleentheid te bied om dit te kan bywoon.
Saamtrekke is ontspanne, sosiale geleenthede waaraan die hele gesin kan deelneem. Sommige streke hou daarvan om georganiseerde aktiwiteite by hul saamtrekke aan te bied, ander streke verkies weer dat die naweek stil moet verloop. Maar niemand word ooit gedwing om by aktiwiteite in te skakel nie. As mens dit so verkies, kan jy ʼn heerlike, stil naweek saam met van jou vriende deurbring terwyl die ander, meer aktiewe lede, hulself besig hou.
Die enigste aktiwiteit waar daar van almal verwag word om teenwoordig te wees, is boekevat en die Sondagoggend erediens. By godsdiensoefeninge word baie noukeurig daarop gelet dat alle Christene tuis moet voel. Geen spesifieke kerkorganisasie word aangehang of bevoordeel nie. Daar word by eredienste, wat gewoonlik deur ʼn plaaslike predikant aangebied word, kollekte opgeneem en hierdie geld word dan aan ʼn verdienstelike organisasie, soos Bybelverspreiding, of ʼn kinderhuis, of iets dergeliks, oorbetaal.
Alhoewel SAWA ʼn woonwa-organisasie is, word ekonomiese werklikhede nie oor die hoof gesien nie. Veral jongmense kan vandag nie sondermeer ’n woonwa bekostig nie. Daarom word lede wat nie ʼn woonwa besit nie maar wel ʼn tent, ook toegelaat.
Christo van der Merwe
SAWA-President
